x

Кибер окото функционира како човечкото око

Категорија: Забава Објавено на 26 Мај, 2020 од GSM.mk

Научниците долги години работат на креирање колку е можно подобро вештачко око, но тешко е да се направи нешто што ќе изгледа како вистински човечки орган.

Истражувачи од Универзитетот за наука и технологија во Хонгконг креираа нова верзија на кибер-око, чија функција и структура има многу сличности со човечкото око.

Вештачката мрежница е изработена од алуминиум оксид исполнет со густо испреплетени нано-жици. Тие се чувствителни на светлина и се направени од соединение наречено перовскит, што најчесто се користи во соларните ќелии.

Тие работат како нервни клетки во човечкото око, пренесувајќи електрични сигнали коа се активираат од светлина. Ова кибер-око има дијаметар од два сантиметра, а празнината во центарот е исполнета со спроводлива течност, пишува британското списание New Scientist.

Научниците веќе тестираа дали кибер-окото го препознава тоа што му се покажува. Тие го поврзаа окото со компјутер, по што ги препозна буквите I, E и Y. Тие истакнаа дека, во теорија истото би се случило доколку го поврзат со човечкиот оптички нерв.

Можностите на кибер-окото се до одреден степен слични на човечкото. Гледа речиси ист спектар на светлина, а времето на реакција е побрзо. Сепак, иако работи исто како човечкото око, сигурно ќе биде потребно долго време пред вештачко око, како што е ова, да се искористи за да им се врати видот на луѓето.

Недостатоците кај кибер-окото се тоа што има помал агол на гледање од десната страна, а резолуцијата е многу пониска отколку, на пример, кај мобилните телефони.

Исто така, научниците веруваат дека еден ден би можеле да го снабдат кибер-окото со сончева светлина, па можеби нема да биде потребен посебен извор на енергија, барем додека не се стемни надвор.

И покрај сѐ, ова би можело да сигнализира возбудлива пресвртница во технологијата, иако веќе ги поместува границите на можностите за вештачко око. Со доволно прецизност и правилен развој, ова може да доведе до импланти кои го обновуваат видот.

Извор: kajgana.com

Преземањето на овој текст или делови од него без непосреден договор со редакцијата на ГСМ Медиа значи експлицитно прифаќање на условите за преземање, кои се објавени тука.